तम्घास (गुल्मी), जेठ १३ गते । कालीगण्डकी गाउँपालिका ले बाँझो जग्गाको सदुपयोग गरी फलफूल खेती विस्तार गर्न कृषकलाई अनुदान दिने नीति ल्याएको छ ।
गाउँपालिकाका अध्यक्ष वेदबहादुर थापाका अनुसार पछिल्लो समय उत्पादनयोग्य जमिन बाँझिँदै गएपछि त्यसको सदुपयोगका लागि यस्तो नीति लागू गरिएको हो । बाँझो जग्गामा फलफूलका बिरुवा रोप्न प्रति खाडल चार सय रुपैयाँ अनुदान तथा फलफूलका बिरुवा गाउँपालिकाले अनुदानस्वरूप उपलब्ध गराउने भएको छ ।
अध्यक्ष थापाले जङ्गली जनावरका कारण खेतीयोग्य जमिन बाँझो हुँदै गएकाले त्यसको विकल्पका रूपमा फलफूल खेती प्रवर्द्धन गर्ने नीति लिइएको बताउनुभयो । “यसले बाँझो जमिनको सदुपयोग हुनुका साथै रोजगारी सिर्जनामा पनि टेवा पुग्छ,” उहाँले भन्नुभयो ।
यस कार्यक्रमका लागि बजेट अभाव हुन नदिन गाउँपालिकाले एक करोड रुपैयाँसम्म व्यवस्थापन गरेको उहाँको भनाइ छ ।
हाल कालीगण्डकीका कृषकहरूले बाँझो जग्गामा खाडल खन्ने काम तीव्र रूपमा गरिरहेको गाउँपालिकाको कृषि शाखाले जनाएको छ । पालिकाले खाडलको लम्बाइ, चौडाइ र गहिराइ एक–एक मिटर हुनुपर्ने मापदण्ड तय गरेको छ ।
गाउँपालिकाले आफ्नै नर्सरीमा १५ हजार सुन्तलाका बिरुवा तयार गरेको छ भने कागती र एभोकाडोका बिरुवा खरिद गरी वितरण गर्ने योजना बनाएको जनाएको छ ।
कालीगण्डकी गाउँपालिका–२ अर्वेनीका कृषक लक्ष्मीपति न्यौपानेले ६२ रोपनी बाँझो तथा जङ्गलले ढाकिएको जग्गा फाँडेर खाडल खन्ने काम गरिरहेको बताउनुभयो । उक्त जग्गामा एक हजार चार सय खाडल अट्ने अनुमान गरिएको उहाँको भनाइ छ ।
उहाँको बगैँचामा हाल दुई हजार पाँच सय सुन्तलाका बिरुवा छन्, जसमध्ये करिब एक हजार छ सय बिरुवाले फल दिन थालेका छन् । गत वर्ष मात्रै किवी र सुन्तला बिक्रीबाट १५ लाख रुपियाँभन्दा बढी आम्दानी गरेको उहाँले बताउनुभयो ।
जिल्लामा कुल एक हजार ७२ हेक्टर क्षेत्रफलमा सुन्तला खेती गरिएको छ । त्यसमध्ये ६४३ हेक्टर क्षेत्रफलमा लगाइएका बिरुवाले उत्पादन दिन थालेका छन् ।