रुपन्देही, २७ फागुन । रुपन्देही क्षेत्र नं. २ मा नेपाली कम्युनिष्ट पार्टी (नेकपा) का तर्फबाट प्रतिनिधि सभा सदस्य पदका उम्मेदवार सुवास पाण्डे (विश्वदीप) ले निर्वाचनमा हार भएपनि सधै यस क्षेत्रका जनताको पक्षमा काम गर्ने प्रतिबद्धता जनाउनुभएको छ । हार पनि जीतको एक खुड्किलो हो भन्दै उहाँले निरन्तर जनताको साथमा रहेर अविछिन्न राजनीतिमा सक्रिय रहने उख्लेख गर्नुभएको छ ।
बुधबार एक विज्ञप्ति प्रकाशित गर्दै युवा नेता पाण्डेले विकास, सुशासन र समृद्धिको पक्षमा इमान्दारितापूर्वक यस क्षेत्रमा काम गर्ने दृढता ब्यक्त गर्नुभएको छ । विज्ञप्तिमा उहाँ लेख्नुहुन्छ– रुपन्देही मेरा लागि केवल एउटा निर्वाचन क्षेत्र मात्रै होइन, म हुर्के बढेको अनि समाज र राष्ट्रका लागि जीवन समर्पण गर्ने निर्णय गरेको कर्मभूमि पनि हो । त्यसैले यो क्षेत्रका लागि मैले देखेका सपना साकार पार्न मैले चुनावमा प्राप्त गर्ने जित र हारले मात्रै निर्धारण गर्न सक्दैन । जसरी मैले यसअघि कुनै सार्वजनिक पद र जिम्मेवारीमा नहरँदा पनि देशका पूर्वप्रधानमन्त्री र अर्थमन्त्रीलगायतका महत्त्वपूर्ण व्यक्तित्वसँगको निकटताका आधारमा यस क्षेत्रको विकासका लागि कोसिस गरेको थिएँ, त्यसलाई अझै दोब्बर बनाउने प्रतिबद्धता व्यक्त गर्दछु । रुपन्देहीवासीको मन र मत एकसाथ जित्ने मेरो प्रयत्न अविच्छिन्न रहनेछ ।
रुपन्देही २ मा बिजयी बन्नुभएका रास्वपाका उम्मेदवार सुलभ खेरेललाई बधाई दिदै युवा नेता पाण्डेले निर्वाचनका बेला आफूसंगै खटेका पार्टीका नेता, कार्यकर्ता, संचारकर्मी, सुभेच्छृक, मतदाता सबैप्रति आभार ब्यक्त गर्नुभएको छ ।
