भुवन कार्की
बुटवल, २३ फागुन । फागुन २१ मा भएको प्रतिनिधि सभा सदस्य पदका लागि रुपन्देही क्षेत्र नंं. २ बाट उम्मेदवार बन्नुभएका राष्ट्रिय स्वतन्त्र पार्टी (रास्वपा) का २९ बर्षीय युवा नेता सुलभ खरेलले निकै बलिया प्रतिस्पर्धी ठानिएका नेकपा एमाले उपाध्यक्ष विष्णु पौडेललाई ठूलो मतान्तरले पराजीत गर्नुभएको छ । यसअघि चार पटकसम्म यस क्षेत्रमा चुनाव जित्नुभएका पूर्व मन्त्री समेत रहनुभएका पौडेलले यसपटक लज्जास्पद हार ब्यहोर्नु परेको छ । कुल मत संख्या ८६ हजार ५ सय ३० रहेको रुपन्देही २ मा खरेलले ५६ हजार ५ सय ५० मत प्राप्त गर्नुभएको छ भने एमालेका पौडेलले १२ हजार ८ सय ६१ प्राप्त गर्नुभएको छ । नेपाली काँग्रेसका चुन्नु पौडेलले ९ हजार ३ सय ९२ मत प्राप्त गर्नुभएको छ । नेपाली कम्युनिष्ट पार्टीका विश्वदीप पाण्डेले १ हजार ४ सय ९ मत प्राप्त गर्नुभएको छ ।
को हुन् सुलभ खरेल ?
रुपन्देहीको बुटवल उपमहानगरपालिका वडा नं. १६ सेमलारमा वि.सं. २०५४ साल भदौ २७ गते जन्मनुभएका सुलभ खरेल कानुन ब्यवसायी पनि हुनुहुन्छ । सामान्य परिवारमा जन्मनुभएका खरेलले विद्यालयतहको अध्ययन रुपन्देहीमै गर्नुभयो । काठमाडौंको त्रिनिटी अन्तराष्ट्रिय कलेजबाट बायोलोजीमा प्लसटुसम्मको अध्ययन गर्नुभयो । नेपाल ल क्याम्पस क्याम्पसबाट कानुन विषयको अध्ययन शुरु गर्नुभएका खरेलले विश्वभरबाट उत्कृष्ट २५ जनामा पूर्ण छात्रवृतिसहित नाम निकाल्न सफल भएपछि अमेरिकाको युनिभर्सिटी अफ मिचिङ्गन स्कूलबाट कानुनमा स्नाकोत्ततर तहसम्मको अध्ययन पुरा गर्नुभएको छ । विभिन्न शैक्षिक संस्थामा अध्ययन अध्यापन गरेरको उहाँको अनुभव छ ।
खासगरी गत भदौ २३ र २४ गतेको जेन्जी आन्दोलनमा युवाहरुको नेतृत्व गर्दै राजनीतिमा थप सक्रिय बन्नुभएका खरेलले चुनाव लड्ने पहिलो अवसरलाई सशक्त रुपमा सदुपयोग गर्नुभयो । रुपन्देहीको राजनीतिक इतिहासमा विकासप्रेमी नेता भनेर जबरजस्त परिचय बनाउन खोजिरहेका नेकपा एमालेका उपाध्यक्ष विष्णु पौडेललाई खेरलले पहिलो प्रयासमै लज्जासपद हारको स्वाद चखाउन सफल हुनुभयो । यसअघि लगातार चार पटकसम्म यहाँ चुनाव जित्नुभएका पौडेललाई फराकिलो मतान्तरले हराउन सक्नु खरेलको ठूलो राजनीतिक उपलब्धी बनेको छ ।
बदलिंदो राजनीतिक परिस्थितिमा समृद्ध देश निर्माणको अभिभारा आफ्नो काँधमा आएको बताउने खरेलले देशमा ब्याप्त भ्रष्टाचार निवारण, सुशासन र दिगो विकासका लागि आफूले हरसंभव खटेर काम गर्ने बताउनुहुँन्छ । संसदमा पुगेर जनताको बहुपक्षीय हितमा कानुन बनाउने अवसरको रुपमा यो जीतलाई आफूले लिएको उहाँको भनाई छ । संविधानको रक्षा गर्दै आवश्यकताको आधारमा जनमुखी कानुन बनाउन आफूले पहल गर्ने बताउनुभयो ।
राजनीति पेशा नभएर सेवा हो भन्ने मान्यता राख्ने युवा नेता खरेलेल सधै जनताप्रति उत्तरदायी बनेर राजनीति गर्नुपर्नेमा जोड दिनुहुन्छ । आफूले अध्ययन गरेर हासिल गरेको विज्ञतालाई ब्यवहारमा उतार्दै नेपालको कानुनी जटिलताको पहिचान गरी समाधान गर्न आफूले प्रयास जारी राखेको उहाँ बताउनुहुन्छ । विगतमा संसद विघटन हुँदा लामो बहस र पैरवी गरेर संविधानको रक्षाका लागि आफू लडेको अनुभव उहाँले सुनाउनुभयो ।
कानुन केवल धाराहरुको संग्रह होइन यसलाई आवश्यकता अनुसार परिवर्तन गरेर निमुखाहरुको पक्षमा बनाउनु पर्छ भन्ने मान्यता राख्ने खरेलले कुन शब्दले कसैको जीवन बदल्न सक्छ र कुन शब्दले कसैको अधिकार खोस्न सक्छ भन्नेमा हेक्का राख्नुपर्ने धारणा राख्नुहुन्छ । निमुखालाई न्याय र संविधानका रक्षाका लागि आफूले अदालतहरुमा बहस पैरवी गर्दै आएको उहाँको भनाई छ । बिगतमा भएका कैयौं असंवैधानिक नियुक्ति र निर्णयबिरुद्ध संघर्ष गर्नुभएका खरेलले राष्ट्रपतिबाट जनसेवा श्री पदक समेत प्राप्त गर्नुभएको छ । ब्यक्तिगत जीत होइन संविधानको रक्षा, देश र जनताको न्यायको लागि आफ्नो जीत भएको उहाँको तर्क छ ।
आफ्नो निर्वाचन क्षेत्रका जनतासंगै सधै हातेमालो गरेर काम गर्ने अठोट उहाँले लिनुभएको छ । आफ्ना मतदातालाई उहाँले धन्यबाद समेत दिनुभएको छ ।
विष्णु पौडेललाई पराजीत गर्ने को हुन् सुलभ खरेल ?
