देशका दुईथरी अतिबाद चिर्न मलाई भोट दिनुहोस् : विश्वदीप
बुटवल, १८ फागुन । आसन्न प्रतिनिधि सभा सदस्य पदका लागि रुपन्देही क्षेत्र नं. २ बाट नेपाली कन्युनिष्ट पार्टी (नेकपा) का उम्मेदवार सुवास पाण्डे (विश्वदीप) को चुनावी अभियान अन्तरगत सोमबार विशाल र्याली निकालिएको छ ।
नेकपाको चुनाव चिन्ह तारामा मतदान गर्न आग्रह गर्दै गीतसंगतिका साथ उम्मेदवार पाण्डेले चुनावी र्याली गर्नुभएको हो । नेकपाका नेता, कार्यकर्ता तथा सयौं सुवेच्छुक मतदाताले र्यालीमा सहभागिता जनाए । उनीहरुले विश्वदीपलाई जिताउन आग्रह गर्दै विभिन्न चुनावी नारा समेत लगाए । र्यालीमा सहभागीले तिलोत्तमाको मणिग्रामबाट जुलुस शुरु गरेर योगीकुटी, बुटवलको देविनगर, मिलनचोक, चौराहा, मिलनचोक, सुख्खानगर, दीपनगर, ट्राफिकचोक, गोलपार्क, अमरपथ तथा सैनामैनाका विभिन्न्न स्थानको परिक्रमा गरी सैनामैनाको मुर्गियामा भेला भएका थिए ।
भेलामा उपस्थित बाक्लो जनसमुदायलाई सम्बोधन गर्दै उम्मेदवार विश्वदीपले आफूलाई तारा चिन्हमा भोट दिएर जिताउन आग्रह गर्नुभयो । उहाँले यो विशेष परिस्थितिको निर्वाचन भएकाले विशेष सुझ्बुझका साथ आफूलाई सघाउन आग्रह गर्नुभयो । देशका दुईथरी अतिबादकाबीच आफू र आफ्नो पार्टीले देशको गहन जिम्मेवारी लिनुपर्ने अवस्था आएको उहाँको भनाई थियो । गत भदौ २३ र २४ गते भएको जेन्जी आन्दोलन दबाउने नाममा विद्यार्थीलाई गोली हान्ने एकथारि अतिबाद र अर्कोदिन देश जलाउने अर्कोथरी अतिबादी समूह दुबै देशका लागि घातक भन्दै देशलाई सही दिशा निर्देश गर्न आफ्नो पार्टीले चुनाव जित्नुपर्ने आवश्यकता उहाँले औंल्याउनुभयो ।
पार्टीका नेता निर्मल जीसीले भ्रष्टाचार र कुशासनकोबिरुद्धमा भएको जेन्जी आन्दोलनका जायज एजेण्डाहरुलाई नेकपाले आत्मसाथ गरेर निर्वाचनमा होमिएकाले नेकपालाई यसपटक जनताले तारा चुनाव चिन्हमा बहुमत दिएर जिताउने विश्वास ब्यक्त गर्नुभयो । अन्य दलका कैयौं पुराना र अनियमितताको दाग लागेका उम्मेदवारका तुलनामा नेकपाका उम्मेदवारहरु निश्कलंक र युवा बौद्धिक उम्मेदवार भएकाले यसपटक नेकपालाई जिताउन सबैमा अपिल गर्नुभयो । जेन्जी आन्दोलनको बेला नेकपाले मुख्य पहलकदमी लिएर यो ब्यवस्था जोगाएको भन्दै जनताले चुनावमा यसको समीक्षा गर्ने उहाँको भनाई थियो ।