बुटवल, १७ फागुन । रुपन्देही क्षेत्र नं. २ मा नेपाली काँग्रेसका उम्मेदवार चुन्नुप्रसाद पौडेलले राष्ट्रिय प्रजातन्त्र पार्टी (राप्रपा) का केही नेतालाई पैसाले किन्न खोजेको राप्रपाले आरोप लगाएको छ ।
आईतबार पत्रकार भेटघाट कार्यक्रम गरी राप्रपा रुपन्देहीले यस्तो प्रतिक्रिया दिएको हो । राप्रपाका जिल्ला अध्यक्ष सागरप्रताप राणाले आफ्नो पार्टीले नेपाली कांग्रेका उम्मेदवार पौडेललाई समर्थन गर्ने कुनै निर्णय नलिएको तर काँग्रेस उम्मेदवारले आफ्नो पार्टीका केही नेतालाई पैसा दिएर किन्ने प्रयास गरेको राणाले बताउनुभयो । राप्रपा क्षेत्र नं. २ का अध्यक्ष रामबहादुर थापा लगायतका नेता कार्यकर्तालाई नेपाली काँगे्रसले आर्थिक प्रलोभनमा पारेर गलत प्रचार गरेको राणाको भनाई छ । थापा र राणाले आईतबार नै फरक फरक विज्ञप्ति निकालेका थिए । जिल्ला अध्यक्ष राणाले पार्टीको कुनैपनि तहमा छलफल र निर्णय नभएको भन्दै नेपाली काँग्रेसका उम्मेदवार पौडेललाई राप्रपाले समर्थन नगर्ने बताउनुभयो ।
रुपन्देही २ मा राप्रपाबाट उम्मेदवारी दिएकी कार्भिका थापाले उम्मेदवारी दिएको भएपनि अमेरिकी पीआर त्यागेको तीन महिना नपुगेको भन्दै उहाँको उम्मेदवारी फिर्ता भएको थियो ।