रास्वपाले भैरहवामा एक लाख जनता उतार्ने

रुपन्देही, ७ फागुन । राष्ट्रिय स्वतन्त्र पार्टी (रास्वपा) ले रुपन्देहीको भैरहवामा आउँदो शनिबार वृहत सभा गर्ने भएको छ । ‘परिवर्तन उद्घोष सभा’ नाम दिएर रास्वपाले वृहत सभा गर्न लागेको हो । कार्यक्रमबारे जानकारी दिन विहीबार रुपन्देहीको मणिग्राममा आयोजना गरिएको पत्रकार सम्मेलनमा यस्तो जानकारी दिइएको हो ।
पत्रकार सम्मेलनमा रास्वपाका केन्द्रीय सदस्य तथा निर्वाचन परिचलान समितिका सदस्य सन्तोष गिरीले शनिबार भैरहवामा साविकको लुम्बिनी अञ्चलका छ जिल्ला र दाङको राप्ती उपत्यकाका जनता उतारेर सभा गर्ने जानकारी दिनुभयो । भैरहवाको उद्घोष सभामा एक लाख जतना उतारेर कार्यक्रम गर्न लागिएको गिरीले बताउनुभयो ।
भैरहवाको कार्यक्रममा पार्टी सभापति रबि लामिछाने र वरिष्ठ नेता बालेन्द्र शाह आउने उहाँले बताउनुभयो । एक लाख जनता उतार्ने भएपनि कार्यक्रम भने दुई घण्टाभित्रै सक्ने गरी कार्यक्रम तय गरिएको गिरीले उल्लेख गर्नुभयो । जेन्जी आन्दोलनको मर्म अनुसार भ्रष्टाचार निवारण, सुशासन र दिगो विकासका एजेण्डा लिएर पार्टी निर्वाचनमा होमिएकाले ती एजेण्डा जनतामाझ राख्न परिवर्तन उद्घोष सभा आयोजना गरिएको गिरीले बताउनुभयो ।
कार्यक्रममा समानुपातिक उम्मेदवार कल्पना पाण्डे, नेताहरु गोपाल घिमिरे, बिनोद खरेल लगायतको उपस्थिति रहेको थियो ।