रुपन्देही, ६ फागुन । रुपन्देहीको निर्वाचन क्षेत्र नं. १ मा नेपाली कम्युनिष्ट पार्टी (नेकपा) का प्रतिनिधि सभा सदस्य पदका उम्मेदवार घनश्याम यादवले चुनाव प्रचार अभियानलाई तिब्रता दिनुभएको छ । उहाँले क्षेत्र नं. १ मा पर्ने देवदह नगरपालिका, तिलोत्तमा, रोहिणी र ओमसतियाका ३३ वटा वडाहरुमा घरदैलो तथा चुनावी प्रचारका कार्यक्रम गरिहनुभएको छ ।
रुपन्देही–१ मा देवदह नगरपालिकाका १२, तिलोत्तमाका ९, रोहिणी गाउँपालिकाका ७ र ओमसतियाका ५ गरी ३३ वटा वडाहरु पर्दछन् । चुनाव प्रचार–प्रसारका लागि तिलोत्तमाका ९ वडाहरुको मुख्य प्रचार कार्यालय तिलोत्तमाको भलवारीमा स्थापना गरिएको छ । तिलोत्तमामा ५ सय ५१ सदस्यीय प्रचार–प्रसार समिति समेत गठन गरिएको छ । प्रचार समितिको संयोजकमा प्रेम जीएम र सहसंयोजकमा कुमार भट्टराई चयन हुनुभएको छ । ५१ सदस्यीय सचिवाल समेत चयन गरिएको संयोजक जीएमले जानकारी दिनुभयो । प्रचार समितिले अहिले तिलोत्तमाका ९ वटै वडाहरुमा पुगेर प्रचार–प्रसारका गतिविधिहरु संचालन गरिरहेको जीएमले बताउनुभयो । वडास्तरमा पनि प्रचार कार्यालयहरु खोलेर काम भइरहेको उहाँले उल्लेख गर्नुभयो ।
रुपन्देही क्षेत्र नंं १ मा यसअघि वि.सं. २०६४ सालमा निर्वाचन जित्नुभएका उम्मेदवार यादवले यसपटक पनि चुनाव जित्ने अपेक्षा गरिएको सहसंयोजक भट्टराईले बताउनुभयो । यस क्षेत्रमा नेपाली काँगेसका हिरा केसी, नेकपा एमालेका दधिराम न्यौपाने, राष्ट्रिय स्वतन्त्र पार्टीका सुनिल लम्साल, राष्ट्रिय प्रजातन्त्र पार्टी प्रज्वल बोहोरा लगायत चुनावी मैदानमा छन् ।
यस निर्वाचन क्षेत्र अन्तरगत देवदहमा ५१०७९, तिलोत्तमामा ४६७७९, रोहिणीमा २७६८८ र ओमसतियामा २१२८८ गरी कुल १ लाख ४६ हजार ८ सय २४ मतदाता रहेका छन् ।
