बुटवल, ३ फागुन । नेपाली कम्युनिष्ट पार्टी (नेकपा) का तर्फबाट रुपन्देही निर्वाचन क्षेत्र नम्बर २ का प्रतिनिधिसभा सदस्य पदका उम्मेदवार सुवास पाण्डे (विश्वदीप) को अगुवाईमा महाशिवरात्री पर्वको अवसर पारेर आईतबार सैनामैनामाको बोलबम मन्दिर परिसरमा सरसफाई कार्यक्रम गरिएको छ । चुनावी घरदैलोको अभियानको क्रममा पाण्डेको नेतृत्वमा सरसफाई गरिएको हो ।
रुपन्देही जिल्लाको प्रसिद्ध धार्मिक स्थलका रूपमा परिचित उक्त मन्दिरमा महाशिवरात्रीका अवसरमा टाढा–टाढाबाट हजारौं भक्तजन आएका थिए । बढ्दो भीडका कारण फोहोर व्यवस्थापन चुनौतीपूर्ण बन्न सक्ने अवस्थालाई मध्यनजर गर्दै सरसफाइ अभियान सञ्चालन गरिएको नेकपाका नेताहरुले बताए ।
सरसफाइका क्रममा संकलन गरिएको फोहोर व्यवस्थापन टिमलाई जिम्मा लगाइएर जनाइएको छ । कार्यक्रममार्फत धार्मिक स्थलको स्वच्छता कायम राख्न तथा वातावरण संरक्षणप्रति जनचेतना अभिवृद्धि गर्ने उद्देश्य राखिएको उम्मेदवार पाण्डेले बताउनुभयो । उम्मेदवार पाण्डेले मन्दिरमा पुजा–अर्चना समेत गर्नुभयो ।
उक्त अवसरमा उहाँले सैनामैनालाई धार्मिक पर्यटकीय क्षेत्रका रूपमा अन्तर्राष्ट्रिय स्तरमा चिनाउन आफूले महत्वपूर्ण भूमिका खेल्ने प्रतिबद्धता व्यक्त गर्नुभयो । साथै यहाँ रहेको प्राकृतिक चिकित्सालयलाई पनि विश्वस्तरमा परिचित गराउन आवश्यक पहल गर्ने उहाँको भनाई थियो ।
त्यसैगरी, यस क्षेत्रको समग्र विकास र देखिएका समस्याको समाधानका लागि निरन्तर प्रयास गर्ने उहाँ को भनाइ छ । उहाँले रुपन्देही निर्वाचन क्षेत्र नम्बर २ का सम्पूर्ण बासिन्दालाई महाशिवरात्री पर्वको शुभकामना व्यक्त गर्नुभयो ।
महाशिवरात्री पर्वको अवसरमा भक्तजनहरूको बाक्लो भीड लागेको छ । उक्त मन्दिर रुपन्देही जिल्लाकै प्रसिद्ध धार्मिक स्थलमध्ये एक मानिन्छ ।
