नदी किनारका बासिन्दाले बुझाए ज्ञापनपत्र
बुटवल, २ फागुन । बुटवलको तिनाउ–दानव नदी वरिपरिका बासिन्दाले रुपन्देही क्षेत्र २ का नेपाल कम्युनिष्ट पार्टी (नेकपा) का उम्मेदवार सुवास पाण्डे (विश्वदीप) लाई शनिबार ८ बुँदे ज्ञापनपत्र बुझाएका छन् ।
तिनाउ–दानव नदी संघर्ष समितिका पदाधिकारीले बस्ती नदीको जोखिममा परेको तथा बस्ती ब्यवस्थापनका विषयमा यसअघिका सरकार तथा जनप्रतिनिधिले वेवास्ता गरेको भन्दै ज्ञपानपत्र बुझाएका हुन् । ज्ञापनपत्र बुझ्दै उम्मेदवार पाण्डेले सुरक्षित बस्ती, तटबन्ध ब्यवस्थापन, क्षति न्यूनीकरण र सम्मानजनक जीवनका लागि आफूले दीर्घकालिन समाधानको पहल गर्ने बताउनुभयो । यहाँका बासिन्दाका समस्या र आवाजलाई निर्णायक तहमा आफूले पुर्याउने आवश्वासन उहाँले दिनुभयो । चुनावी घरदैलोमा रहनुभएका उम्मेदवार पाण्डेलाई स्थानीयबासीले ध्यानाकर्षण गराउँदै नदी किनारका बस्तीका जोगाइदिन आग्रह गरेका थिए ।
यसैबीच रुपन्देही निर्वाचन क्षेत्र नं. २ अन्तरगत सैनामैना वडा नं. वडा नं. १ र बुटवल वडा नं. ७ र ८ को चुनाव प्रचार–प्रसार कार्यालय पनि शनिबारै उम्मेदवार पाण्डेले उद्घाटन गर्नुभएको छ । उद्घाटन कार्यक्रममा बोल्दै उहाँले आफूले निषेधको राजनीति नगरेको भन्दै अन्य दलले जस्तो एकअर्कामा दोषारोपण आफूले नगर्ने बताउनुभयो । सधै जनताको साथमा रहेर काम गर्ने उहाँको भनाई थियो ।
कार्यक्रममा नेकपा नेताहरु राम परियार, निर्मल जीसी, नारायण महत, सीता दिपक भण्डारी, सीता कुँवर पूर्णचन्द्र पाण्डे गुप्तबहादुर खत्री, गणेश अधिकारी, कृष्णबहादुर थापा लगायतले बोल्दै नेकपाका उम्मेदवार पाण्डेलाई जिताउन तारा चिन्हमा मतदान गर्न आम मतदातालाई आग्रह गर्नुभयो । शनिबारै दिपनगरमा नेकपा नेताहरुले घरदैलो समेत गरेका छन् ।
