रुपन्देही, २४ माघ । रुपन्देही क्षेत्र नं. २ मा नेपाली कम्युनिष्ट पार्टी (नेकपा) को तर्फबाट उम्मेद्वार विश्वदीप पाण्डे (सुवास) ले शनिबार बुटवलमा युवासंग सुझाव माग्नुभएको छ । बदलिंदो राजनीतिक परिस्थितिमा निर्णायक भूमिका युवाले नै खेल्नुपर्ने पाण्डेले बताउनुभयो । बुटवलमा अयोजित युवा भेलमा उहाँले सुझाव माग्नुभएको हो ।
आफू युवाको प्रतिनिधित्व गर्ने उम्मेदवार भएकाले आम युवाको सुझाव अनुसार काम गर्न पनि जनतामा आएको उहाँले उल्लेख गर्नुभयो । आफू अहिलेसम्म कुनै भ्रष्टाचार र अनियमिततामा नजोडिएको उम्मेदवार भएकाले आम मतदाताले आफूलाई मत दिएर जिताउने विश्वास ब्यक्त गर्नुभयो । कार्यक्रममा उपस्थित युवाहरुले युवा नेता पाण्डेलाई जिज्ञासासहित सुझाव दिएका थिए । जवाफमा नेता पाण्डेले अरुले भन्दा केही फरक गरेर देखाउने प्रतिबद्धता ब्यक्त गर्नुभयो ।
भ्रष्टाचार र कुशासनकोबिरुद्धमा भएको जेन्जी आन्दोलनका जायज एजेण्डाहरुलाई नेकपाले आत्मसाथ गरेर निर्वाचनमा होमिएकाले नेकपालाई यसपटक जनताले तारा चुनाव चिन्हमा बहुमत दिएर जिताउने उहाँले विश्वास ब्यक्त गर्नुभयो ।
कार्यक्रममा नेकपा नेता निर्मल जीसीले अन्य दलका कैयौं पुराना र अनियमितताको दाग लागेका उम्मेदवारका तुलनामा नेकपाका उम्मेदवारहरु निश्कलंक र युवा बौद्धिक उम्मेदवार भएकाले यसपटक नेकपालाई जिताउन सबैमा अपिल गर्नुभयो । जेन्जी आन्दोलनको बेला नेकपाले मुख्य पहलकदमी लिएर यो ब्यवस्था जोगाएको भन्दै जनताले चुनावमा यसको समीक्षा गर्ने उहाँको भनाई थियो ।
शनिबारै नेता पाण्डेले तिलोत्तमाको वडा नं. ४ मा घरदैलो समेत गर्नुभएको चुनाव प्रचार कार्यालय उद्घाटन गरिएको चुनाव परिचालन समिति वडा नं. ४ का संयोजक नेत्र रुचालले जानकारी दिनुभयो ।
यसैबीच उम्मेदवार पाण्डेले बुधबार बुुटवलको वडा नं.३ र ४ को पनि प्रचार कार्यालय उद्घाटन गरेर वडा नं. २ मा घरदैलो गर्नुभएको छ । बुटवलकी ९३ बर्षिया वृद्धा निमा भूसालको हातबाट टिका आर्शिबाद लिएर उहाँले घरदैलो अभियान शुरु गर्नुभएको हो ।
