रुपन्देही २ मा नेकपाको घरदैलो अभियान जारी

रुपन्देही, २३ माघ ।  प्रतिनिधि सभा सदस्य पदको निर्वाचनको लागि रुपन्देही क्षेत्र नं. २ मा नेपाली कम्युनिष्ट पार्टी (नेकपा) को तर्फबाट उम्मेद्वार विश्वदीप पाण्डे (सुवास) ले घरदैलो अभियान जारी राख्नुभएको छ । पाण्डेले शुक्रबार क्षेत्र नं. २ मा पर्ने तिलोत्तमा नगरपालिका वडा नं. ३ र ४ मा घरदैलो गर्नुभयो ।
पार्टीका नेताहरु राम परियार, निर्मल जीसी, दिपा विक, रिज्जु श्रेष्ठ, सुजित बिक लगायतका नेताहरुको साथमा पाण्डेले घरदैलो गर्नुभएको हो । घरदैलोको क्रममा उम्मेद्वार पाण्डेले नयाँ राजनीतिक परिस्थिति अनुसार युवाको भावना र उन्नत बिचारसहित राजनीतिमा आएकाले यसपटक आफूलाई तारा चिन्हमा मत दिएर जिताउन अपिल गर्नुभयो । जनताको सेवा गर्ने गरी आफू राजनीतिमा आएको बताउँदै निर्वाचनमा हारजीत जेसुकै भएपनि जनताको साथ नछोड्ने उहाँको भनाई छ ।
नेपाली कम्युनिष्ट पार्टीले नै जेन्जी आन्दोलनको मर्म र भावना अनुसार काम गर्न सक्ने बताउँदै पार्टीले सोही अनुसार आफूलाइं यस निर्वाचन क्षेत्रमा खटाएको उहाँले उल्लेख गर्नुभयो । नेपाली राजनीतिमा पुस्ताहन्तरण पनि आवश्यक रहेको भन्दै पाण्डेले पुरानालाई अभिभावक र नयाँसंग सहकार्य गरेर देशलाई अग्रगामी दिशामा अघि बढाउन सकिने बिचार ब्यक्त गर्नुभयो ।
युवा नेता पाण्डेले गतसाता देखि आफ्नो निर्वाचन क्षेत्रमा घरदैलो अभियान शुरु गर्नुभएको हो । रुपन्देही क्षेत्र नं. २ मा पर्ने सैनामैनाका चारवटा वडामा पाण्डेले घरदैलो गरेर तिलोत्तमाका वडाहरुमा घरदैलो थाल्नुुभएको छ । तिलोत्तमाका वडाहरुमा घरदैलो अभियान जारी रहेको वडा नं. ४ का चुनाव परिचालन समिति संंयोजक नेत्र रुचालले जानकारी दिनुभयो । उहाँका अनुसार तिलोत्तमाका सुनौलो नगर, शान्ति चोक, डिंगरनगर लगायतका ठाउँमा घरदैलो अभियान पुरा गरिएको छ ।