सैनामैनाका चार वडामा घरदैलो अभियान
रुपन्देही, २० माघ ।
आगामी फागुन २१ गते हुने प्रतिनिधि सभा सदस्य पदको निर्वाचनको लागि रुपन्देही क्षेत्र नं. २ मा नेपाली कम्युनिष्ट पार्टी (नेकपा) को तर्फबाट उम्मेद्वार विश्वदीप पाण्डे (सुवास) ले सधैव यहाँका जनताको सेवा गर्ने गरी आफू राजनीतिमा आएको बताउनुभएको छ । निर्वाचनमा हारजीत जेसुकै भएपनि जनताको साथ नछोड्ने उहाँको भनाई छ ।
मंगलबार बुटवलमा वडा नं. ११ को प्रचार–प्रसार कार्यालय उद्घाटन गर्दै युवा नेता पाण्डेले देशको पछिल्लो राजनीतिक अवस्थाबारे परिचर्चा गर्नुभयो । नेपाली कम्युनिष्ट पार्टीले नै जेन्जी आन्दोलनको मर्म र भावना अनुसार काम गर्न सक्ने बताउँदै पार्टीले सोही अनुसार आफूलाइं यस निर्वाचन क्षेत्रमा खटाएको उहाँले उल्लेख गर्नुभयो । नेपाली राजनीतिमा पुस्ताहन्तरण पनि आवश्यक रहेको भन्दै पाण्डेले पुरानालाई अभिभावक र नयाँसंग सहकार्य गरेर देशलाई अग्रगामी दिशामा अघि बढाउन सकिने बिचार ब्यक्त गर्नुभयो ।
युवा नेता पाण्डेले गत शुक्रबारदेखि आफ्नो निर्वाचन क्षेत्रमा घरदैलो अभियान शुरु गर्नुभएको थियो । रुपन्देही क्षेत्र नं. २ मा पर्ने सैनामैनाका चारवटा वडामा पाण्डेले घरदैलो अभियान सक्नुभएको छ । घरदैलो अभियानको क्रममा सैनामैनाबासीले निकै सद्भावका साथ आफूलाई हौसला प्रदान गरेको पाण्डेले अनुभव सुनाउनुभयो । सैनामैनाका वडा नं. १, २, ३ र ४ मा उहाँले घरदैलोमै पुगेर जनतासंग भोट माग्नुभएको छ । मंगलबार उहाँले सैनामैनाको मुर्गिया क्षेत्रमा शिलशिला पथ, रारा पथ, बुद्ध पथ, प्रगति टोल, प्रभात टोल, सिसौडांडा लगायतका ठाउँमा घरदैलो गर्नुभएको हो ।
पार्टीले आयोजना गरेको वडा नं. ११ प्रचार–प्रसार कार्यालय उद्घाटन कार्यक्रममा निर्वाचन परिचालन समितिका संयोजक नारायण जीसी (निर्मल) ले पुराना दलहरु नेकपा एमाले र नेपाली काँग्रेसको अबैज्ञानिक राज्य संचालन नीतिका कारण देशमा जेन्जी आन्दोलन भएको चर्चा गर्नुभयो । अब जेन्जी आन्दोलनको मर्म अनुसार काम गर्न सक्ने पार्टी नेकपा नै रहेको उहाँको भनाई थियो । कार्यक्रममा नेताहरु शिव घिमिरे, माधव पन्त लगायतकाले बोन्दै यसपटक नेकपाका उम्मेद्वार पाण्डेलाई जिताउन सबैमा अपिल गर्नुभयो ।
