भूमिहीनलाई जग्गा दिलाउन नापजाँचको काम जारी

बुटवल, ९ असार । भूमि समस्या समाधान आयोगले बुटवल क्षेत्रका भूमिहीनलाई लालपुर्जा बितरणको तयारी थालेको छ । आयोगले रूपन्देही जिल्ला अन्तर्गत बुटवल उपमहानगरपालिकाको वार्ड नम्बर २, ४, १२, तथा १३ का अब्यवस्थित भूमिहीनलाई जग्गाको स्वामित्व दिलाउने गरी जग्गा नापजाँच काम अघि बढाएको छ ।
यसै अन्तरगत आईतारदेखि बडा नं. १२ को ढबाहमा जग्गा नावजाँचको काम सुरु गरिएको छ । भूमि समस्या समाधान आयोग रूपन्देहीका अध्यक्ष कुमार थापाको रोहवरमा ढवाहामा जग्गा नापजाँच सुरु गरिएको हो । उक्त अवसरमा धारणा राख्दै थापाले वर्षौदेखि भूमिको स्वामित्व नपाएका नागरिकले अब छिटै स्वामित्व ग्रहण गर्ने विश्वास ब्यक्त गर्नुभयो । भूमि समस्या समाधान गर्न आफूले सक्दो पहल गरिरहेको उहाँको भनाई छ ।
वडा नं. १२ का वडा अध्यक्ष डिल्लीप्रसाद शर्मा आचार्य तथा टोल विकास समितिका अध्यक्ष योगेन्द्र छन्तेलले भूमि आयोगले समस्या समाधानको पहल गरेकोमा आभार प्रकट गर्नुभयो । भूमिहीनलाई न्याय हुने गरी कार्य सम्पादन गर्न उहाँहरुको आग्रह छ ।
बुटवल उपमहानगरपालिका प्राविधिक तथा कर्मचारीहरूले जग्गा तथा बाटो नावजाँचको काम सुरु गरेका छन् । भूमि समस्या समाधानको लागि भूमि आयोग, नगरपालिकाकाका जनप्रतिनिधि लगायत कर्मचारी, राजनीतिक दल, समाजसेवी बुद्धिजीवी सबैको सहगोग रहेको नगरपालिकाले जनाएको छ ।
भूमि आयोगले बुटवल क्षेत्रका १२ सय ७९ जनाको जग्गा हकदाबीको सूचना प्रकाशित गरेर लालपुर्जा बितरणको तयारी थालेको हो । त्यसका लागि कर्मचारीहरुको सातवटा टोली बनाएर जग्गा तथा बाटो नापजाँचको काम चलिरहेको नगरपालिकाले जनाएको छ ।