बुटवल, २५ जेठ ।
बुटवल/ गुल्मी ईस्माका बादल कुँवर ७ वर्षको उमेरमा काठमाडौं हानिए । तर उनलाई त्यो काठमाडौंले २२ वर्षसम्म आफ्ना बुवा आमासंग भेट हुन दिएन । किनकी उनी त्यहीं काठमाडौंबाट फ्रान्सेली नागरिकको छोरा बनेर फ्रान्स पुगे । छोरा छोरी नभएका जोडीले बादललाई आफ्नै छोरा बनाएर त्यहाँ लगे । यो कुरा बादलका बुवाआमाले सुईकोसम्म पाएनन् । बादलले पनि बिस्तारै घरपरिवार भुल्दै गए । उनलाई नपुग्दो केही भएन ।
जब बादल बयस्क हुँदै गए, उनलाई आफन्तको याद त आउन थाल्यो तर त्यतिबेलासम्म उनले नेपाली भाषा भुलिसकेका थिए। उनलाई बुवाआमा कसरी भेट्ने भन्ने राम्रोसंग थाहा नै भएन ।
इस्मा गाउँपालिका -१ हर्पुकोटका बादलका बुवा टिकाबहादुर कुँवर नेपाली सेनामा कार्यरत हुँदा उनि बुवासङ्गै काठमाण्डौ गएका थिए । र, पछि उतैबाट हराएका थिए । त्यतिबेला उनकी आमा अम्बिका कुँवर वैदेशिक रोजगारीका शिलशिलामा साउदी अरब थिईन । छोरा बेपत्ता भएपछि श्रीमान श्रीमतिबीच मनमुटाव बढ्नु स्वाभाविक थियो, किनकी आफ्नै काखबाट पतिले छोरा गुमाएका थिए । टिकाकी पत्नीलाई छोराको राम्रो ख्याल गरेको भए हराउने थिएन की भन्ने लाग्नु स्वाभाविकै हो । छोराको बारेमा लामो समयसम्म कुनै कुरा थाहा नलागेपछि माया मारेर बसेको बेला फ्रान्समै रहेका छिमेकी प्रकाश बोहराले बादललाई फ्रान्समै भेटेर परिचय गर्ने क्रममा पत्ता लगाए । यसपछि सुरु भयो घरमा भिडियो कल । लगत्तै उनै प्रकाशले बादललाई लिएर घरमै आएका हुन ।
त्रिभुवन अन्तर्राष्ट्रिय बिमानस्थलमा ओर्लेपछि बादलले आफू फ्रान्सबाट तीन पटक नेपाल आएको प्रकाशलाई बताए । त्यतिबेला आफ्नो घर कहाँ हो भन्ने जानकारी नहुँदा नेपाल बस्न नपाएको तितो अनुभव समेत उनले सुनाए । आफ्ना बुवाआमा नेपालमै छन भन्ने जान्दाजान्दै पनि खोजबिन गर्न सकेनन् । कुनै आधारबिना खोज्न सकिने कुरा पनि भएन ।
यता घरमा जब छोरो बेपत्ता भए, आमा डिप्रेशनको शिकार बनिन् । औषधि उपचारले उनी बाँचेकी हुन । शुक्रबार राति एक्कासि छोरा आउँदा बिच बाटोमै लिन आएकी आमाले छोरालाई धेरैबेर अंगालोमा बाँधिन र डाँको छोडेर रोईन । बादल पनि धेरैबेरसम्म आमाको अङ्गालोमा लुट्पुटिदै आँशु खसालेका थिए ।
बादलले बुवाआमाको मुहार बिर्सेपनि दाजु आकाशलाई बाल्यपनमा सङ्गै खेलेकोले नबिर्सिएको बताए। बिमानस्थलमा दाजु आकाशलाई देख्दासाथ बादल अङ्गालो हालेर रोएका थिए ।
बादल आमाबुबा र आफन्त भेटेपछि औधि खुसी छन् । आज बिहान आफूले सानो छँदा पढेको बिध्यालय हेरे र छिमेकमा भेटघाटमा रमाए । जे सुकै परिस्थितिमा बादल लामो समयसम्म बेपत्ता भएपनि अबदेखि उनले बुवाआमा र आफन्तको आँशु पुछ्ने काम भने गर्नैपर्दछ ।
प्रेम सुनारको सहयोगमा अजरन्यूज डटकम Prem Sunar #hiddenstory