काठमाडौं , १३ जेठ । नेकपा (माओवादी केन्द्र)का स्थायी समिति समिति सदस्य एवम पूर्वमन्त्री रेखा शर्माले अरुका लागि गणतन्त्र सामान्य भए पनि माओवादीका लागि भने रगतले लेखिएको बताएकी छन् । कृष्ण सेन इच्छुकको २३ औँ स्मृति दिवसका अवसरमा प्रेस सेन्टर नेपालले मंगलबार काठमाडौं गरेको पिसिएन सम्बाद कार्यक्रममा उनले यस्तो बताएकी हुन् ।
उनले भनिन्, ‘गणतन्त्र सानो तिनो दुखले आएको होइन । यसमा जनताको ठुलो योगदान छ माओवादीका लागि गणतन्त्र रगतले लेखिएको हो । राजनीतिक विचारले मात्रै होइन भावनात्क हिसावले पनि हो ।’
पूर्व सञ्चार तथा सूचना प्रविधिमन्त्री समेत रहेकी माओवादी नेता शर्माले कतिपय साना तिना कमजोरीलाई हेरेर गणतन्त्रमाथी प्रश्न उठिरहेको र अर्कोतिर अहिले सरकारमा बसेकाले काम गर्न नसकेकाले प्रश्न उठिरहेको बताईन । उनले भनिन्, ‘गणतन्त्रप्रति प्रश्न उठाइएका छन् । यो लोकतान्त्रिक गणतन्त्र कतिपयलाई मन परेको छैन । साना तिना कमजोरीलाई उठाएर प्रश्न उठेका एउटा मन नपररेर र अर्को वातावरण नबनेर उठिरहेको छ । सरकारमा बसेकाले काम गर्न नसकेका कारण प्रश्न उठ्ने अवस्था आएको छ । गणतन्त्रको पक्षमा लड्ने पक्षमा नभएर अरुको पक्षमा काम भइरहेकाले प्रश्न उठिरहेको छ । सुशासन आजको आवश्यकता हो । त्यसको पक्षमा काम गर्न जरुरी छ ।’