पाल्पा, १६ बैशाख । पाल्पा निर्वाचन क्षेत्र नं. २ का सांसद डा. माधवबहादुर थापाले पाल्पा जिल्लाका कार्यालय प्रमुखहरुसंग मंगलबार तानसेनमा छलफल तथा अन्तरक्रिया गर्नुभएको छ ।
जिल्ला प्रशासन कार्यालय पाल्पामा आयोजित कार्यक्रममा बोल्दै राष्ट्रिय स्वतन्त्र पार्टी (रास्वपा) का सांसद थापाले मुलुकमा सुशासनको प्रत्याभूति हुने गरी सेवाग्राहीको काम गर्न कार्यालय प्रमुखहरुलाई निर्देशन दिनुभयो । मुख्यतया जनताका आधारभूत आवश्यकतालाई ध्यानमा राखेर काम गर्नुपर्ने उहाँको भनाई थियो । भ्रष्टाचारको अन्त्य, सुशासन र दिगो विकासको लागि वर्तमान सरकारले हरसंभव प्रयास गरिरहेको भन्दै थापाले आम कर्मचारी तथा राष्ट्रसेवकले त्यसमा साथ दिनुपर्नेमा जोड दिनुभयो ।
पाल्पा जिल्लाको समग्र विकास, सुशासनको सुदृढिकरण तथा प्रभावकारी सेवा प्रवाहको लागि आपसी समन्वय र सहकार्य जरुरी रहेको पनि सांसद थापाले औंल्याउनुभयो । जनताप्रति उत्तरदायी भएर काम गर्न कार्यालय प्रमुखहरुलाई उहाँले आग्रह गर्नुभयो । कार्यक्रममा उपस्थित कार्यालय प्रमुखहरुले पनि आफ्ना धारणा राख्नुभएको थियो ।
कार्यक्रममा बिनु बज्राचार्य कुँवर, जिल्ला न्यायाधिश हरिप्रसाद शर्मा, सुरक्षा निकायका प्रमुखहरु तथा अन्य कार्यालयका प्रमुखहरु उपस्थित रहनुभएको थियो ।