थापा भन्छन्– केही फरक गरेर देखाउँछुु
भुवन कार्की
पाल्पा, २५ माघ । आगामी फागुन २१ गते हुने प्रतिनिधि सभा सदस्य पदको लागि पाल्पा क्षेत्र नं. २ मा राष्ट्रिय स्वतन्त्र पार्टी (रास्वपा) का उम्मेदवार डा.माघव थापाले शनिबार पश्चिम पाल्पाको जुठा, सत्यवती, बुढिदमार, राजापानी, खुर्साने लगायतका गाउँमा मतदाता भेटघाट गर्नुभएको छ ।
मतदाता भेटघाटको क्रममा उम्मेदवार थापाले देशको बदलिंदो राजनीतिक परिस्थितमा यसपटका रास्वपाका उम्मेदवारलाई भोट दिएर जिताउन आग्रह गर्नुभयो । देशमा ब्याप्त भ्रष्टाचार रोक्न, सुशासन र दिगो विकासका लागि नीति बनाउनुपर्ने भएकाले नीति निर्माण तहमा रास्वपाका नेतालाई पुर्याउनुपर्ने उहाँको भनाई छ । रास्वपाबाट उम्मेदवारी दिएका उम्मेदवारहरु सबै सक्षम, पढेलेखेका र कुनै न कुनै काममा विज्ञता हासिल गरेका युवा भएकाले उनीहरुलाई राज्यको नीति निर्माण तहमा पुर्याउनुपर्ने अहिलेको आवश्यकता उहाँले औंल्याउनुभयो । जनताका साना घरायसी समस्यादेखि गाउँ, टोल र समग्र देशको मूल कानुनमा सुधार गर्न पनि रास्वपाका उम्मेदवारलाई यसपटक बहुमत दिनुपर्ने उहाँको भनाई थियो । पुराना दल र नेताहरुबाट देश देशले उचित निकास पाउन नसकेको भन्दै यसपटक रास्वपालाई बहुमत दिए आफूहरुले आमूल परिवर्तनको पक्षमा काम गर्न सक्ने थापाले बताउनुभयो । आफूले पुरानाले भन्दा केही फरक गरेर देखाउने प्रतिबद्धता पनि उहाँले ब्यक्त गर्नुभयो ।
मतदाता भेटघाटको क्रममा स्थानीय जानताले थापालाई सुझाव सल्लाह समेत दिएका छन् । बुढिदमारका भूपू सैनिक लालबहादुर रानाले पुरानाले भन्दा फरक र उन्नत काम गरेर देखाउन आग्रह गर्दै यसपटक भोट परिर्वतन गरेर रास्वपाको घण्टी चुनाव चिन्हमा मतदान गर्ने आफूले निर्णय लिएको उल्लेख गर्नुभयो ।
त्यस्तै राजापानीका युवा ओमबहादुर राष्कोटी मगरले आमुल परिवर्तनको संवाहक रास्वपानै हुने संकेत देखिएकाले यसपटक घण्टीमै मतदान गर्ने र स्थानीय बासिन्दालाई एकताबद्ध गर्न आफूले पहल गर्ने बताउनुभयो । सोही स्थानका धनबहादुर रानाले पनि पुराना दलबाट आश्वासन पाएअनुसार काम नभएकाले यसपटक भोट परिवर्तन गर्न जरुरी रहेको उल्लेख गर्नुभयो । खुर्सानेका जितु बुढाथोकीले पनि यसपटक नयाँ पार्टी र नेतालाई परीक्षण गर्नुपर्ने बताउनुभयो ।
रास्वपा युवा उम्मेदवार थापाले आईतबार तिनाउ गाउँपालिकामा मतदाता भेटघाट तथा अन्तरक्रिया गर्नुभएको छ । उहाँले हार्थोक, कुसुमखोला, बतासे, अमलाबास, छहरा, म्यालढाप, तिनगिरे लगायतका ठाउँमा पनि कार्यकता तथा मतदाता भेटघाट गर्नुभएको छ ।
