को हुन् पाल्पा–२ का रास्वपा उम्मेद्वार डा. माधव थापा ?

भुवन कार्की
बुटवल, १४ माघ । आगामी फागुन २१ गते हुन लागेको प्रतिनिधि सभा सदस्य पदको निर्वाचनको लागि देशभर उम्मेद्वारले चुनावी गतिविधिहरु गरिरहेका छन् । दुईवटा निर्वाचन क्षेत्र रहेको पाल्पा जिल्लामा पनि चुनावी सरगर्मी बढेको छ । पाल्पा क्षेत्र नं. २ को निर्वाचनमा यसपटक निकै रोचक चुनावी प्रतिस्पर्धा हुने देखिएको छ । केही पुराना र केही नयाँ उम्मेद्वारबीच चुनावी लडाई हुन लागेको हो । यस क्षेत्रमा नेपाली काँग्रेसबाट हिमालदत्त श्रेष्ठ, नेकपा एमालेबाट ठाकुर गैरे, नेपाली कम्युनिष्ट पार्टी (नेकपा) बाट सोमप्रसाद पाण्डे, राप्रपाबाट डुलबहादुर कुँवर लगायत अरु विभिन्न दल तथा स्वतन्त्र उम्मेद्वारले उम्मेद्वारी दर्ता गराएका छन् ।
यस निर्वाचन क्षेत्रमा यसअघि पुराना राजनीतिक दल नेपाली काँगे्रस र नेकपा एमालेको प्रतिस्पर्धा हुने गरेको भएपनि यसपटक भने भिन्न परिस्थिति देखिएको छ । साविकको नेकपा माओवादी केन्द्र र नेकपा समाजवादी मिलेर बनेको नेपाली कम्युष्टि पार्टी (नेकपा) र राष्ट्रिय स्वतन्त्र पार्टी (रास्वपा) का उम्मेद्वार पनि यस क्षेत्रमा अहिले बलिया उम्मेद्वारका रुपमा देखिएका छन्, जसका कारण यसक्षेत्रमा कस्ले जीत हात पार्छ भनेर अनुमान गर्न गाह्रो छ । नयाँ पार्टी रास्वपाका उम्मेद्वार डा. माधव थापाले पनि यस क्षेत्रमा यसपाली राम्रै प्रतिस्पर्धा गर्न सक्ने जानकारहरु बताउँछन् । उनी एक नयाँ आशालाग्दा युवा नेता हुन् ।
को हुन् डा. माधव थापा ?
पाल्पाको रिब्दीकोट गाउँपालिका वडा नं. ७ बतासेमा वि.सं. २०३७ साल कात्तिक ४ गते जन्मिनु भएका डा. माधव थापा स्वास्थ्य क्षेत्रका एक कुशल नक्षत्रको रुपमा परिचित अनुहार हो । सामान्य किसानी परिवारमा जन्मिनुभएका थापाले लामो संघर्षपछि राजनीतिक जीवन पनि सुरु गर्नुभएको हो । हुन त विगत १५ बर्षदेखि नेपाली काँग्रेसको सदस्यता लिएर राजनीतिमा पनि भाग लिंदै आउनुभएका थापाले अहिले भने रास्वपा प्रवेश गरेर राजनीतिक उचाई बढाउने कोशिस गर्नुभएको छ । रास्वपा प्रवेश गरेको छोटो अवधिमै उम्मेद्वार समेत बन्ने अवसर पाउनुभएका डा. थापालाई चुनावी प्रतिस्पर्धामा खरो उम्मेद्वारको रुपमा लिइएको छ । युवा पुस्ताको अभियानको अगुवा बन्ने चाहना राख्नुभएका थापाले पुराना दलका उम्मेद्वारलाई यसपटक पराजीत गर्न हरसंभव कोशिस गरेको बताउनुभयो । उहाँले भन्नुभयो, ‘पुराना दल र नेताहरुले गरेको विकास अधुरो र अपारदर्शी छ, कैयौं बिचलनहरु देखिएका छन्, जनतामा निराशा धेरै छ, ती समस्या समाधानको लागि मेरो उम्मेद्वारी हो । मैले सुशासन, सामाजिक न्याय, भ्रष्टाचार निवारण र दिगो विकासका लागि काम गर्ने अठोट लिएको छु ।’
डा. थापाले बदलिंदो राजनीतिक परिस्थिति अनुसार युवा तथा जेन्जी आन्दोलनको भावना अनुसार काम गर्ने चाहना अनुरुप उम्मेद्वारी दिएको उल्लेख गर्नुभयो । विशेषगरी देशबाट युवा पलायन रोक्न र देशमै केही गर्न सकिन्छ भन्ने ध्ययका साथ रोजगारमूलक नीति कार्यक्रमहरु ल्याउन जरुरी रहेको उहाँको भनाई छ ।
स्वस्थ्य क्षेत्रका साथै सामाजिक सेवाको क्षेत्रमा लागेर बुटवलमा घेरै चर्चा कमाउनुभएका थापाले होमियोप्याथिक चिकित्सामा विज्ञता हासिल गर्नुभएको छ । आरकेडीएम होमियोप्याथिक अस्पताल मध्यप्रेश भारतबाट होमियोप्याथिक चिकित्सा सम्बन्धी अध्ययन गर्नुभएका थापाले थुप्रै पक्षघातबाट बिरामीहरुको जीवन बचाएको अनुभव सुनाउनुहुन्छ । माध्यामिक तहसम्मको शिक्षा पाल्पा रिब्दीकोटको कुसुमखोलामा हासिल गर्नुभएका थापाले चिकित्सा विज्ञानको अध्ययन भने भारतमा गर्नुभएको हो ।
बुटवलमा कालिका होमियोप्याथिक अस्पताल संचालन गर्नुभएका डा. थापाले कोभिड १९ को बेला विभिन्न सामाजिक संघसंस्थाको समन्वयमा रोगप्रतिरोधात्मक औषधिको निःशुल्क वितरण गरेको बताउनुभयो । लुम्बिनी प्रदेशमा हजारौं मानिसलाई औषधि वितरण गरिएको उहाँले उल्लेख गर्नुभयो ।
अहिले रास्वपाले लिएको देशब्यापी अभियानमा आफू जोडिन पाउँदा खुसी लागेको बताउने डा. माघव थापाले जेन्जी आन्दोलनको मर्म अनुसार संसदीय प्रणालीद्धारा पार्टीका आधारभूत मान्यता र एजेण्डाहरुलाई स्थापित गर्न आफू दृढ रहेको बताउनुभयो । पाल्पा क्षेत्र नं. २ का जनताले चाहेको विकास र समृद्धिको चाहना पुरा गर्न आफू प्रतिबद्ध रहेको भन्दै आफ्नो उन्नत अभियानमा सघाउन आफूलाई घण्टी चुनाव चिन्हमा मतदान गर्न उहाँले पाल्पाबासीलाई अपिल गर्नुभयो । चुनावमा हारजीत जेसुकै भएपनि आफू सधै पाल्पाली जनताको सेवामा लाग्ने दृढ संकल्प लिएको पनि उहाँले बताउनुभयो ।